جالنا میں احتجاجی پر DYSP کی لات، خودسوزی کی کوشش کی ویڈیو وائرل

اشاعت: 16 اگست 2025 • واقعہ: 15 اگست 2025 • رپورٹ: نیوز ڈیسک

جالنا — یومِ آزادی کے موقع پر جالنا میں پیش آنے والے اس واقعے نے پولیس انتظامیہ کی کارکردگی پر سوالات اٹھا دیے ہیں۔ ضلع کے پولیس ڈپٹی سپرنٹنڈنٹ (DYSP) اننت کلکرنی کی ایک ویڈیو وائرل ہوئی ہے جس میں وہ احتجاج کرنے والے گوپال چوہدری کو پیٹھ سے لات مارتے دکھائی دیتے ہیں۔ چوہدری کئی روز سے خاندانی تنازع میں انصاف کے لیے ضلع کلکٹر کے دفتر کے سامنے دھرنا دیے بیٹھے تھے۔

خودسوزی کی کوشش اور پولیس کی کارروائی

گوپال چوہدری نے انصاف نہ ملنے کی شکایت کرتے ہوئے یومِ آزادی کے دن پولیس کو خودسوزی کی دھمکی والا خط دیا تھا۔ جمعہ کے روز انہوں نے ضلع کلکٹر کے دفتر کے سامنے اپنے اوپر مٹی کا تیل ڈالا اور خودسوزی کی کوشش کی، تاہم موقع پر موجود پولیس نے انہیں روک کر حراست میں لے لیا۔

اسی دوران، جب پولیس انہیں لے جا رہی تھی، تو وائرل ویڈیو میں دیکھا جا سکتا ہے کہ DYSP کلکرنی دوڑ کر آتے ہیں اور چوہدری کی کمر پر زور دار لات مارتے ہیں۔ یہ منظر سوشل میڈیا پر تیزی سے پھیلا اور عوامی غم و غصے کا باعث بنا۔

احتجاج کی وجہ

گوپال چوہدری کا دعویٰ ہے کہ ان کی بیوی نے دوسری شادی کر لی ہے۔ انہوں نے اس سلسلے میں جالنا پولیس اسٹیشن میں شکایت درج کرائی تھی، مگر ان کا کہنا ہے کہ پولیس نے ان کی بیوی کو گرفتار کرنے کے بجائے محض وعدے کیے۔ انصاف نہ ملنے پر دلبرداشتگی کے باعث انہوں نے خودسوزی کی کوشش کی۔

پولیس انتظامیہ کا موقف

“گوپال چوہدری کی بیوی نے تقریباً ڈیڑھ سے دو سال قبل امراؤتی میں دوسرا نکاح کیا تھا۔ اس سلسلے میں انہیں متعدد بار قانونی طریقہ کار سے آگاہ کیا گیا ہے۔ اس کے باوجود وہ قومی تہواروں پر احتجاج کرتے رہتے ہیں۔ جمعہ کو انہوں نے ضلع کلکٹر کے دفتر کے قریب خودسوزی کی کوشش کی، جس کے دوران ایک خاتون پولیس اہلکار پر بھی مٹی کا تیل گِرا۔ لہٰذا پولیس نے قوتِ نافذہ استعمال کر کے انہیں روکا اور مقدمہ درج کیا۔” — DYSP اننت کلکرنی

عوامی و سماجی ردِعمل

سوشل میڈیا پر واقعے کی سخت مذمت، متعلقہ افسر کے خلاف فوری کارروائی کا مطالبہ۔
سماجی کارکنان نے استفسار کیا کہ چونکہ یہ واقعہ کیمرے میں ریکارڈ ہوا، اس لیے بحث ہورہی ہے؛ مگر تھانوں اور حوالات میں غریبوں اور مظلوم طبقات پر ہونے والے زیادتیوں کے اکثر واقعات منظرِ عام پر نہیں آتے۔

نوٹ: یہ رپورٹ دستیاب ویڈیو اور بیانات کی بنیاد پر تیار کی گئی ہے۔ کسی بھی سرکاری تفتیش یا آئندہ کارروائی کے نتیجہ آنے پر معلومات اپڈیٹ کی جائیں گی۔

#Jalna #DYSP #احتجاج #خودسوزی #پولیس_کارروائی