تندے کے جبڑوں سے ٹکرائے شیر دل دادا: جان ہتھیلی پر رکھ کر پوتے کو بچایا

کوپرگاؤں (اہلیہ نگر)، مہاراشٹر:
اصل بہادری وہ ہوتی ہے جب کوئی انسان اپنے عزیز کی جان بچانے کے لیے خود خطرے کا سامنا کرتا ہے۔ کوپرگاؤں تعلقہ کے یساگاؤں شیوار میں ہفتہ کے روز ایک دل دہلا دینے والا واقعہ پیش آیا، جس میں ایک بزرگ دادا نے اپنے 4 سالہ پوتے کو تندے (چیتے) کے جبڑوں سے چھین کر زندہ بچا لیا — اور اب پورے مہاراشٹر میں ان کی دلیری کی تعریف ہو رہی ہے۔

واقعہ اس وقت پیش آیا جب چار سالہ کُنال اجے آہر اپنی ماں کے پیچھے پیچھے گھر سے باہر نکلا۔ تبھی گنے کے کھیت میں چھپا ہوا ایک تندہ اچانک اس پر جھپٹا، اور اُسے اپنے جبڑوں میں دبوچ کر کھیت کی طرف گھسیٹنے لگا۔

پوتے کی چیخ و پکار — “آجو با… آجو با…” — سن کر دادا مچھیندر آہر فوراً گھر سے باہر دوڑے۔ سامنے کا منظر روح کو جھنجھوڑ دینے والا تھا — ان کا پیارا پوتا تندے کے جبڑوں میں تھا۔ مگر دادا نے خوف کے بجائے جگر سے کام لیا۔

        مچھیندر آہر نے بغیر ہچکچائے سیدھا تندے پر حملہ کر دیا۔ ہاتھوں سے اس پر جھپٹے، اور چند لمحوں کی اس خطرناک جھڑپ کے بعد تندہ گھبرا گیا اور پوتے کو وہیں چھوڑ کر جنگل کی طرف بھاگ نکلا۔
    

پوتا شدید زخمی حالت میں تھا، مگر اس کی جان بچ گئی۔ اُسے فوری طور پر اسپتال پہنچایا گیا، جہاں اس کا علاج جاری ہے۔ ڈاکٹروں کے مطابق اب اس کی حالت مستحکم ہے۔

پورے علاقے میں اس واقعے نے تہلکہ مچا دیا ہے۔ سوشل میڈیا پر لوگ دادا کو “ریئل ہیرو” اور “شیر دل آجو با” کے لقب سے نواز رہے ہیں۔

محکمہ جنگلات کی کارروائی

جیسے ہی محکمہ جنگلات کو اطلاع ملی، ان کی ٹیم جائے وقوعہ پر پہنچی، اور علاقے میں پنجرہ لگا دیا گیا ہے۔ تندے کی تلاش جاری ہے۔ مقامی لوگوں نے مطالبہ کیا ہے کہ کوپرگاؤں میں بڑھتے ہوئے تندوں کی موجودگی کو دیکھتے ہوئے فوری حفاظتی اقدامات کیے جائیں۔