जालन्यातील सेवली परीक्षा केंद्रातील विद्यार्थ्यांची गुंडागिरी, -कॉपी करण्यासाठी शिक्षकानांच दिल्या धमक्या, केंद्रप्रमुखांची बंदोबस्त वाढविण्याची मागणी..

जालना- परीक्षेत कॉपी करु देण्यासाठी चक्क शिक्षकानांच धमकावल्याचा प्रकार जालना जिल्ह्यातील सेवली येथील परीक्षा केंद्रावर समोर आला आहे. याबाबत तेथील केंद्रप्रमुख यांनी शिक्षण अधिकारी व पोलीस अधिक्षकांकडे केंद्रावर बंदोबस्त वाढवण्याची मागणी निवेदनाद्वारे केली आहे.

सर्वत्र 10 वी, 12 वीच्या परीक्षा सुरु आहेत. सेवली येथील केंद्रावर देखील परीक्षा सुरु आहेत. आतापर्यंत या गावातील परीक्षा केंद्रांवर मुक्तपणे कॉप्या पुरविल्या जायच्या. परंतु यावर्षी शासनाने कॉपी मुक्त अभियान राबविले असल्याने हा प्रकार बंद करण्यात आला आहे. यामुळे विद्यार्थी आणि त्यांचे पालक प्रचंड चिडले आहेत. चिडलेल्या विध्यार्थी व पालकांनी बुधवारी (दि. 8) रोजी नेहमी प्रमाणे कॉपी पुरविण्याचा प्रयत्न केला. परंतु केंद्रावरील पर्यवेक्षक आणि अधिकाऱ्यांनी त्यांना विरोध केला. मात्र, विध्यार्थी व पालक यांच्याकडून धमक्या येत असल्याने येथील कर्मचारी व अधिकाऱ्यांनी पोलिसात तक्रार दिली आहे. तसेच याबाबत एक तक्रार जिल्हाधिकारी, पोलीस अधीक्षक आणि शिक्षणाधिकाऱ्यांकडे केली आहे. तर केंद्रावर वाढीव पोलीस बंदोबस्त देण्याची मागणी केली आहे.

जि.प. प्रशाला सेवली ता. जालना येथील SSC व HSC परीक्षा केंद्रावर दि. ०८ मार्च २०२३ रोजी कर्मचारी कार्यरत होते. परीक्षा चालू असतांना परीक्षा केंद्रा बाहेरून चारही बाजूने मोठ्या संख्येने लोक परीक्षार्थी यांना कॉपी पुरविण्याच्या उद्देशाने जमा झालेले होते. त्यांना विरोध केला असता व त्यांनी फेकलेल्या कॉप्या विद्यार्थ्या पर्यंत पोहचू न दिल्याने व पर्यवेक्षकांनी कॉपी न करू दिल्याने पर्यवेक्षकांना या लोकांनी कॉपी न करू दिल्यास व पोलीसात तक्रार दिल्यास जीवे मारण्याच्या धमक्या देत होते व दगडफेक करून शांततामय वातावरणात परीक्षा घेण्यास बाधा निर्माण करत होते. त्यांच्या या कृत्यामुळे परीक्षा केंद्रावर कर्तव्य बजावणारा कर्मचारी वर्ग भयभित झाला असून त्यांनी आपल्या जिवितासही धोका असल्याने या पुढे पुरेशी सुरक्षा न मिळाल्यास कर्तव्य बजावण्यास नकार दिला आहे.

तर शासकीय कामात अडथळा निर्माण करणाऱ्या पालकांवर गुन्हा दाखल करण्यात यावा, अशी मागणीही त्यांनी निवेदनात केली आहे.